Në datat 25-26 shtator në Prishtinë mbahet konferenca shkencore “Studimet Albanistike në Amerikë” dhe organizohet nga Seksioni i Gjuhësisë dhe i Letërsisë i Akademisë së Shkencave dhe të Arteve të Kosovës.
Rreth 50 studiues nga Kosova, Shqipëria, Shtetet e Bashkuara të Amerikës, Gjermania, Kanadaja, Italia, Franca, Polonia, Norvegjia, Maqedonia, Kina dhe Bullgaria do të hedhin dritë mbi aspekte të rëndësishëm jo vetëm linguistike por gjithashtu edhe historike dhe antropologjike të studimeve albanistike në kontinentin amerikan.
Studimet albanistike në Amerikë kanë nisur në shekullin 20-të dhe jo rastësisht këto fillime ndërlidhen edhe me praninë e mërgatës shqiptare atje. Ndërkaq, kjo prani është ndjerë më shumë pikërisht në kohën e zhvillimeve të bujshme në shkencat linguistike në SHBA.
Konferenca mbahet në sallën e madhe të Akademisë së Shkencave dhe të Arteve të Kosovës, të premten dhe të shtunën (25-26 shtator) duke filluar nga ora 8:30.
Sipas njoftimit në këtë konferencë do të marrin pjesë studiues të njohur të gjuhësisë shqiptare por edhe të huaj nisur nga Bahri Beci, Bardhyl Demiraj, Bashkim Kuçuku, Brian Joseph, Carly Dickerson, Carrie Ann Morgan, Dhurata Shehri, Jani Thomai, Kolec Topalli, Ledi Shamku-Shkreli, Seit Mansaku, Shaban Sinani, Victor Friedman, Zymer Neziri etj.
Tema të ndryshme do të diskutohen gjatë punimeve dy ditore të kësaj konference shkencore. Studiuesi Victor Friedman nga Chicago do të trajtojë temën “Gjuha shqipe në Amerikë: Perspektiva akademike”, Brian Joseph, (The Ohio State University) temën “Përfytyrimi i shqipes ndër gjuhëtarët e hershëm amerikanë”, Mehmet Kraja do të parashtrojë temën “Ëndrra amerikane e shqiptarëve etj.