Kryeministri i Kosovës Isa Mustafa dhe kryetari i Aleancës për Ardhmërinë e Kosovës, Ramush Haradinaj, kanë shndërruar polemika mes tyre në Facebook.
Isa Mustafa ka reaguar pas deklaratave të Ramush Haradinajt – i cili, duke folur në emër të popullit, ka deklaruar se do ta arrestojnë Kryeministrin, nëse do të arrestohen deputetët opozitarë që kanë hedhuer gaz lotsjellës në Kuvendin e Kosovës.
Kryeministri, në një postim në llogarinë e tij në Facebook, ia ka përmendur liderit të AAK-së “Liqenin e Radoniqit”.
“Ramushi e paska dhënë një deklaratë të fortë në Interaktiv: ‘Nëse arrestohen deputetët, populli do ta arrestoj Isa Mustafën”… ndoshta në Liqenin e Radoniqit. Populli thotë se atje ka te burgosur të ‘popullit’…”, ka shkruar Mustafa në Facebook.
Kurse, lideri i AAK-së është kundërpërgjigjur menjëherë, po ashtu me një postim në Facebook.
“More Isë, për Radoniqin Tribunali i Hagës i ka gjetë fajtorët dhe ata janë gjeneralët serbë Gjorgjeviq e Llazareviq, të cilët mund t’i kesh njohur e bashkëpunuar me ta, sepse që të dy kanë shërbyer në Prishtinë.
Kështu e ka jeta, të gjithë diktatorët e kanë të njëjtin fat, të njëtin fund!”, ka shkruar Ramush Haradinaj.