Kryetari i Komunës së Malishevës, Ragip Begaj, me qëllim të njohjes me punën e bizneseve në qytetin e Malishevës, sot i ka vizituar disa prej tyre, kryesisht në rrugën “Rilindja Kombëtare”, ku është njohur me punën që bëjnë, problemet me të cilat ballafaqohen bizneset, si dhe për pengesat që shkaktohen nga parkingu përgjatë kësaj rruge.
“Ne i kemi hequr taksat komunale dhe kjo ka qenë mundësia jonë si komunë, në mënyrë që të krijojmë sadopak lehtësira për zhvillimin e veprimtarisë së bizneseve tona”, the kryetari Begaj, gjatë bisedave me pronarët e këtyre bizneseve.
“E di që keni probleme në punën tuaj, por ne si komunë jemi për shfrytëzimin e të gjitha mundësive, që bizneset të zhvillohen, pasi rrjedhimisht me zhvillimin e bizneseve, hapen edhe vende të reja pune”, tha Begaj.
Po ashtu një problem me të cilin ballafaqohet qyteti i Malishevës, është edhe qarkullimi i automjeteve përgjatë rrugëve kryesore, pasi parkingu përgjatë rrugës e pengon qarkullimin e lirë të automjeteve, prandaj, hapja e parkingjeve të reja, prapa lokaleve afariste, apo hapja e disa parkingjeve të mëdha, është zgjidhja më e mirë, për largimin e pengesave në qarkullim. /PrizrenPress.com