Kuvendi i Komunës së Malishevës, i drejtuar nga kryesuesi i saj, Aziz Thaçi, ka mbajtur sot mbledhjen e katërt të jashtë radhës, ku në rend dite kishte dy pika. Njëra nga pikat ishte edhe rishqyrtimi sipas kërkesës së MAPL-së, lidhur me deklaratën e miratuar me 29 shtator të këtij viti, kundër formimit të Asociacionit të Komunave serbe në Kosovë. Anëtarët e KK të Malishevës, nuk kanë votuar fare, për apo kundër kërkesës së MAPL-së dhe ministrit të kësaj ministrie, por e kanë mbështetur fuqishëm deklaratën e miratuar një muaj më parë.
Bazuar në deklarimet e anëtarëve të Kuvendit të Komunës së Malishevës, përkatësisht të anëtarëve të subjekteve NISMA, VV dhe AAK, u tha se “e mbështesim fuqishëm deklaratën e miratuar me 29 shtator 2015, kundër formimit të Asociacionit të Komunave serbe në Kosovë dhe e rikonfirmojmë edhe njëherë vendimin për deklaratën kundër këtij asociacioni”. (Diskutimin në këtë pikë, e kanë bojkotuar anëtarët e kuvendit nga subjektet e LDK-së dhe PDK-së-gjithsejtë 13 anëtar).
Një pikë tjetër e rendit të ditës në mbledhjen e sotme, ishte renditja e anëtarëve të kuvendit, pas ridizajnimit të sallës së mbledhjeve të Kuvendit të Komunës, ku anëtarët e saj, votuan për inicimin e procedurës për ndryshimin dhe plotësimin e rregullores së punës së kuvendit, në të cilën do të rregullohet edhe çështja e ulëseve, përkatësisht renditjes në kuvend, të anëtarëve të subjekteve politike. Për ndryshimin dhe plotësimin e kësaj rregullore, KK i Malishevës, formoi edhe komisionin që do të merret me këtë ndryshim të rregullores.