Veton Surroi, një nga personazhet më të njohura në fushën e mendimit në hapësirat shqiptare, prezantohet në edicionin e 18 të Panairit të Librit, me katër vepra që vijnë nën siglën e botimeve “Saras”. I njohur për stilin dhe metaforat përmes së cilave mund të lexosh shpesh të ardhmen e asaj çdo ndodhë jo vetëm në Kosovë, publicistika e Surroit gjithnjë lë një shije të gjatë te ty, pasi e ke lexuar. Të njëjtën ndjesi ta jep dhe leximi i dy veprave publicistike, të cilat mund t’i gjesh në stendën e “Sarasit” “Flutur” dhe “Ambasadori i Melkizedekut”.
Ky i fundit të bën të takosh personazhe të rëndësishme të historisë së Kosovës së pasluftës dhe të shohësh një portret gati historik që Surroi i bën ish-presidentit të ndjerë të Kosovës, Ibrahim Rugova. I ashpër ndaj krizës së gjatë politike ekonomike jo vetëm në Kosovë, në këtë libër Surroi flet dhe për atë çfarë shihet si shqetësim sot, islamin politik. Por “Sarasi” na jep mundësinë ta shohim ndryshe publicistin.
Në stendën e saj ju mund të gjeni dy romanet e tij, që tregojnë një shkrimtar po aq interesant sa në publicistikë, i cili të bën të ndihesh i ndryshuar, pasi e ke lexuar. “Këmbët e gjarprit”, libri që u prit me debate në Kosovë, si një alegori ndaj ish-kryeministrit Hashim Thaçi, tashmë është në stendën e “Sarasit”. Në shijen e letërsisë së mirë të Surroit, vjen dhe romani “Miliarderi”. Surroi do të ketë një takim me lexuesit nesër, në orën 14:00, në sallën ovale të Panairit të Librit.