Kryeministri i Serbisë, Ivica Daçiq deklaroi mbrëmë që nuk e di nëse ka të drejtë të votojë në zgjedhjet lokale të 3 nëntorit në Kosovë, por që gjithsesi do të dëshironte të votonte, po qe se kjo është e mundur, në mënyrë që të nxiste serbët që të dalin në zgjedhje lokale të nëntorit.
Pas bisedimeve që pati me zëvendëskryeministrin dhe shefin e diplomacisë sllovake, Mirosllav Llajçak, Daçiq tha se e ka pyetur drejtorin e zyrës për Kosovën, Aleksandar Vullin, se a ka të drejtë të votojë në zgjedhjet kosovare pasi është i lindur në Prizren. Mirëpo, për këtë akoma nuk ka marrë përgjigje.
“Nuk e di se a kam të drejtë vote, por mendoj që pjesëmarrja ime në ato zgjedhje do të ishte jashtëzakonisht e rëndësishme për serbët e Kosovës, sepse në këtë mënyrë do t’iu tregonim të gjithë serbëve që duhet të dalin në zgjedhje, gjë që është me rëndësi sepse organet serbe në Kosovë do të mund të konstituoheshin edhe zyrtarisht dhe do të pranoheshin ndërkombëtarisht”, tha Daçiq, transmeton agjencia Fonet.