Dalja nga bllokada politike dhe shtetërore. Zgjedhjet e reja mund të nxjerrin në skenë subjekte të reja
Derisa edhe me seancën e parë të Kuvendit të Kosovës për fillim të vitit 2017, që filloi punimet gjatë ditës së djeshme, u pa qartë se normaliteti dhe stabiliteti i institucioneve të shtetit të Kosovës nuk mund të rikthehet derisa nuk ka akordim mes pozitës dhe opozitës, përjashtimi i opozitës nga punimet e seancës vetëm sa e ka thelluar edhe më shumë hendekun politik dhe krizën institucionale.
Zgjidhja e vetme mbetet në shpërbërjen e Kuvendit dhe shpalljen e zgjedhjeve të reja të jashtëzakonshme, njëkohësisht me atë për zgjedhjen e presidentit të ri të Kosovës, qoftë me gjetjen e një kandidature konsensuale nga spektri politik në vend apo edhe me marrëveshje për zgjedhje të drejtpërdrejtë nga vota qytetare.
Analistët vlerësojnë se zhgënjimi nga partitë aktuale favorizon nismat e reja, të cilat nuk janë të ngarkuara politikisht, por kanë kapacitete për të bërë ndryshime.
Politologu Albinot Maloku për Kosova Sot thotë se Republika e Kosovës, pas zgjedhjeve të fundit, nuk pati një stabilitet politik bash në kohën kur Kosova e pati më të nevojshme stabilitetin e zhvillimin e saj si shtet, dhe kriza u instalua sidomos nga ish-blloku VLAN e më pastaj me ikjen nga ky bllok të LDK-së dhe bashkëngjitjen e saj me PDK-në, për të vazhduar me një situatë kur Kosovën e kapluan krizat e gjithanshme. Maloku pohon se nuk ka shans që kriza tani të zgjidhet.
“Tani, si kurrë më parë, shteti i Kosovës dhe politika e tij ka nevojë për një proces zgjedhor me alternativa të reja”, tha Maloku. /Kosova Sot/