Gjykata Themelore në Prizren, dje, shpalli fajtor tre të pandehurit me inicialet O.A – shtetas turk, B.F nga Ferizaj dhe N.N – shtetase turke, për veprat penale “krim të organizuar” dhe “kontrabandim me migrantë”.
Trupi gjykues i përbërë nga dy gjyqtarë ndërkombëtarë dhe një gjyqtar vendor ka dënuar O.A me 6 vjet burgim dhe me gjobë prej 6 mijë euro, B.F dënohet me 5 vjet burgim dhe me gjobë prej 4 mijë euro, dhe N.N dënohet me 6 vjet burgim dhe me gjobë prej 6 mijë euro.
Ndërsa, i pandehuri F.A, nga Prizreni, lirohet nga të gjitha akuzat e aktakuzës.
Në komunikatë të Gjykates Themelore të Prizrenit thuhet se është lëshuar një aktvendim i veçantë, ku është vendosur në lidhje me masën e paraburgimit për të pandehurit e dënuar të cekur më poshtë.
“Për secilin nga të pandehurit O.A, B.F dhe N.N, koha e kaluar dhe që duhet të kalohet në paraburgim do të zbritet nga dënimet e lartcekura që janë shqiptuar, sipas nenit 73 të KPK-së. Të gjitha palët kanë të drejtë të ushtrojnë ankesë ndaj Aktgjykimit të shpallur brenda pesëmbëdhjetëditësh nga momenti kur ata e marrin atë, dhe në mënyrë specifike në lidhje me aktvendimin e veçantë mbi masën e paraburgimit, ata e kanë të drejtën e njëjtë që brenda tre ditësh që llogaritet nga momenti i marrjes së tij. Ky aktvendim i veçantë u është dërguar palëve sot”, thuhet në kumtesën e gjukatës së Prizrenit. /PrizrenPress.com/