Lideri i LDK-së, Isa Mustafa, e ka përjetuar fitoren e Hashim Thaçit për President edhe si fitore të tij personale.
Një ditë pas votimit, Mustafa ka folur për deputetët e LDK’së që s’ishin pjesë e seancës ku u votua lideri i PDK’së për kreun e shtetit. Ka thënë se është frikësuar se mos disa prej tyre janë zënë peng në çadrat e Vetëvendosjes.
“Dikush më tha se i kanë frikësuar, e tjetri se kanë fluturuar, me marrë udhëzime në çadrat e verës australiane. Kryesorja që janë gjallë! Ata që e respektuan votën e qytetarëve ishin në Parlament. Nuk u frikësuan”, ka shkruar Mustafa, në Facebook.
“Dje, derisa VV po bënte terror mbi institucionet e Republikës së Kosovës, derisa ma sulmonin shtëpinë me shishe molotovi, pyeta ku janë edhe disa deputet që kanë marrë vota në emër të LDK-së, sepse nuk shiheshin se janë me shumicën e kolegëve të tyre. Frikohesha se janë zënë peng në çadrat e VV. Por, jo!”.