Albin Kurti fajëson Ramush Haradinajn për moskrijimin e “Alternativës për Kosovën”, që do t’i bashkonte tri partitë opozitare, “Vetëvendosjen”, AAK-në, “Nismën”, dhe shoqërinë civile.
Ai thotë se AAK-ja luajti rol destruktiv, duke vendosur kushte për “Vetëvendosjen”
AAK-ja nuk ishte e gatshme për ndërtimin e Alternativës dhe se subjekti i Ramush Haradinajt nuk kishte parime, por interesa partikulare, kështu thotë ish-lideri i Lëvizjes “Vetëvendosje”, Albin Kurti, në intervistë për gazetën “Zëri”.
Ai bën të ditur se kishte pranuar kërkesën e AAK-së që në listë të ishin të barabarta me pjesëmarrje, 40 me 40, edhe pse “Vetëvendosja” është subjekti më i madh opozitar. Por, sipas tij, Haradinaj këmbëngulte që ta kishte ose mandatarin, ose bartësin e listës.
“Por ne nuk mund ta pranonim një imponim të tillë. Pra, prej dy kërkesave të tyre ne e pranuam njërën kërkesë, por ata donin që ne t’i pranonim të gjitha, kjo ishte e papranueshme për ne”, ka treguar për “Zërin” Kurti.