Festivali i përvitshëm i muzikës rok dhe alternative në Prishtinë, “Rock për Rock”, do të mbajë edicionin e sivjetmë mbrëmjen e së premtes (3 qershor) në Teatrin Oda.
Në këtë edicion të 15-të në skenën e “Rock për Rock” do të ngjitën nëntë grupe.
Para adhuruesve të rokut do të performojnë grupet nga Tirana “Premenstrual Syndrome”, “Urtar”, “Nihil”, “The Social Sons” dhe “Further”, për të vazhduar me bendet e tjera, “Fullstop” nga Shkupi, “Fortuna” nga Kaçaniku dhe grupet lokale nga Prishtina “Frisson” dhe “Prishtina Rock School”.
Mysafir i “Rock për Rock” sivjet është grupi “Land of Confusion”.
“Rock për Rock” ka karakter garues dhe në fund të mbrëmjes zakonisht zgjidhet një fitues.
Festivali është tradicional. Për katërmbëdhjetë edicione të realizuara dhe në pritje të edicionit të pesëmbëdhjetë ky organizim ka krijuar karakterin e vet dhe është një ndër ngjarjet më të mëdha të kësaj natyre.