Në Institutin Albanologjik të Prishtinës sot është përuruar trilogjia e autorit Selatin Novosella “1. Adem Demaçi në gjykimin e parë, në vitin 1958, 2. Adem Demaçi në gjykimin e dytë, në vitin 1964 3. Adem Demaçi në gjykimin e tretë, në vitin 1975” kushtuar simbolit të rezistencës kombëtare Adem Demaçi.
Me këtë rast, të pranishmit e kanë vlerësuar lart figurën e Adem Demaçit.
Në këtë promovim është thënë se Demaçi është misionar i çështjes kombëtare. Në këtë trilogji janë dhënë fakte nga tri gjyqet e Adem Demaçit.
Ministri i Arsimit, Arsim Bajrami, ka thënë se këta libra na tregojnë për figurën e pathyeshme të Demaçit dhe rrugën e vështirë që ka kaluar populli shqiptar.
“Ky gjykim nuk është gjykim i Adem Demaçit por i kauzës së kombit”, ka thënë Bajrami.
Ai ka thënë se shekulli i kaluar ka qenë shekull i padrejtësive për shqiptarët, kurse sipas tij, ky shekull është i shqiptarëve.
“Duhet të kthejmë kujtesën tonë historike dhe duke i lexuar këto libra do të shohim se rruga jonë ka qenë e vështirë. Askush nuk mund të udhëheq me politika diskriminuese kundër shqiptarëve”, ka thënë ministri Bajrami.
Kurse ambasadori i Shqipërisë në Kosovë, Qemal Minxhozi, ka thënë se edhe Shqipëria do ta nderojë figurën e Adem Demaçit me rastin e 80-vjetorit të lindjes së tij, duke organizuar aktivitete të ndryshme në pjesën e dytë të këtij viti.
Në fund të këtij përurimi ka folur edhe autori i kësaj trilogjie, Selatin Novosella. Ai ka thënë se ka qenë privilegjuar që ka qenë një nxënës dhe bashkëveprimtar i vogël i Adem Demaçit.