Prizreni po e përmbyll një vit shkollor të qetë. Mirëpo, ky përfundim i vitit shkollor ka probleme në emërtimin e drejtorëve në shkolla.
Si rast më eklatant është ai në SHFMU “Bajram Curri” në fshatin Romajë, ku atje është emëruar Refki Demaj. Mirëpo, Këshilli i Prindërve të këtij fshati ka mbledhur 567 nënshkrime, në mbrojte të ish-drejtoreshës Drita Qenaj. Ajo, duke folur për “Kosova Sot”, tha se i është bërë e padrejtë dhe për këtë është ankuar në të gjitha instancat.
Kurse drejtori i Arsimit, Nexhat Çoçaj shprehet se Drejtoria e Arsimit nuk ka menaxhuar me këtë konkurs.
“Këto emërime i ka bërë Zyra e Personelit dhe unë s’kam ndonjë dijeni për këto raste”, ka thënë Çoçaj.
Drita Qenaj tregon se edhe ajo i është nënshtruar testit për pranim në vendin e punës drejtor, mirëpo pohon se nuk është vlerësuar realisht.
Kamerat dhe policia largojnë huliganët nga oborret e shkollave
Ndryshe, siguria në shkollat e Prizrenit është cilësuar e qetë. Zëdhënësi i Policisë, Hazir Berisha shprehet se siguria në shkollat tona është për lakmi.
Ai shprehet se tashmë në shkollat e mesme të këtij qyteti janë vendosur kamerat vëzhguese, kurse edhe sigurimet që mbikëqyrin objektet shkollore kanë kontribuar dukshëm që kjo siguri të shtohet në shkolla.
“Mbi të gjitha, ajo që duhet veçuar është fakti që policia ka shtuar vizitat dhe kontrollimet nëpër shkolla”, ka thënë Haziri, duke shtuar se një brengë që ka qenë më herët rreth qenve endacakë tanimë nuk është prezente.
Në banjat e shkollave pihet duhan nga nxënësit Drejtori i Shkollës së Mesme të Mjekësisë në Prizren “Luçiano Motroni”, Samir Krasniqi, shpjegon se shkolla ka qenë shkollë e qetë.
“Prania e policisë dhe e kamerave vëzhguese kanë bërë që huliganët e rrugëve të mos sillen më nëpër oborre shkollash dhe siguria mund të them se është e mirë”, ka thënë drejtori Krasniqi.
Por, nxënësit kanë ankesa lidhur me mbarëvajtjen e procesit mësimor dhe rregullit brenda objekteve. Nxënësit Albina Mehmeti, Fitim Gashi dhe Mirlinda Jetullahu tregojnë se në shkolla ka siguri, por ata ankohen më shumë se në banjat e shkollave pihet duhani. /Kosova Sot/