Drejtori i Drejtorisë së Arsimit dhe Edukim në Malishevë, Avdi Morina, ka uruar të gjithë qytetarët e Komunës, drejtuesit e shkollave, mësimdhënësit, prindërit dhe nxënësit fillimin e vitit të ri shkollor,
“Më lejoni të uroj përzemërsisht në emrin tim dhe të Drejtorisë së Arsimit dhe Edukimit, të gjithë qytetarët e Komunës së Malishevës, drejtuesit e shkollave, mësimdhënësit, prindërit dhe nxënësit”, thuhet në urimin e tij.
“Një urim i veçantë shkon enkas për fatosat, që për herë të parë këtë vit ulen në bankat shkollore. Pas një pushimi veror disa javor, po u kthehemi ditarëve e bankave shkollore, me urimin për një vit sa ma të mbarë dhe të suksesshëm”.
“Për dallim nga vitet paraprake, ky vit shkollor në Komunën e Malishevës po fillon me shumë objekte të reja shkollore, që për herë të parë sivjet i hapin dyert për nxënës dhe mësimdhënës. Me kabinete të reja e me infrastrukturë moderne, e cila do t’u krijojë nxënësve hapësirë, dhe mundësi për t’i shfaqur dhe demonstruar aftësitë dhe talentet e tyre në fusha të ndryshme shkencore e shoqërore. Komuniteti shkollor do t’i gëzohet shumë terreneve sportive (të hapura dhe të mbyllura), ku talentet sportivë do t’i tregojnë cilësitë e tyre, në disiplina të ndryshme sportive”. /PrizrenPress.com/