Në Malishevë sot është mbajtur takimi i Këshillit Ndërministror për parandalimin dhe luftimin e Etheve Hemorragjike Krime-Kongo, ku është thënë se në këtë komunë për tri vitet e fundit nuk është shënuar asnjë vdekje nga pickimi i rriqrave.
Kryetari i Komunës së Malishevës, Ragip Begaj, tha se puna e përbashkët dhe koordinimi i mirë midis nivelit qendror dhe atij lokal, ka bërë që qytetarët e Malishevës ta heqin frikën nga një e keqe që ka dominuar me vite.
“Puna e përbashkët ka bërë që, përkundër faktit që sivjet ka pasur mbi 1333 thumbime, të mos kemi asnjë rast të vdekjes, sikurse edhe dy vitet e kaluara dhe kjo pa dyshim që është një fitore e përbashkët”, tha Begaj.
Ai tha se rezultatet e tre viteve të fundit janë një fitore që dëshmon se puna profesionale me përkrahjen edhe të pushtetit rezulton me sukses të përbashkët.
“Është shumë e rëndësishme që qytetarët e Malishevës ta ndiejnë se e kanë larguar rrezikun nga rriqrat dhe besojmë që sukseset do të vazhdojnë edhe në vitet në vijim”, tha Begaj.
Ministri i Shëndetësisë, Imet Rrahmani tha se mbajtja e takimit në Malishevë, ishte një ide për të falënderuar kështu komunitetin për angazhimin dhe bashkëpunimin e mirë midis niveleve në luftimin me sukses të EHCC.
“Fakti që qe tre vjet nuk kemi asnjë viktimë nga EHCC flet për rezultate të mira të arritura së bashku. Unë jam i përkushtuar që punët e mira t’i shtyjmë para dhe një prej këtyre punëve ishte edhe puna e Këshillit Ndërministror për EHCC”, tha Rrahmani, duke theksuar se takimi në Malishevë ishte ide që qytetarët e kësaj komune dhe vet rajoni, ta ndiejnë praninë e pushtetit dhe përkrahjen për t’u ballafaquar me sukses me EHCC.
Tashmë që përvojën e kemi përpara, tha më tej ministri Rrahmani, uroj që edhe vitin tjetër të flasim për një vit pa viktima, e gjithashtu edhe në vitet në vijim, në mënyrë që “kjo sëmundje të mbetet pastaj si histori”.
Drejtori i IKSHP-së, Naser Ramadani, ka prezantuar një rrjedhë të situatës epidemiologjike sa i përket EHCC prej vitit 2000 deri në vitin 2016, duke theksuar faktin se në tre vitet e fundit, nuk është shënuar asnjë rast i vdekjeve, ndërkohë që prej vitit 2000-2013 në Kosovë ishin regjistruar 49 raste të vdekjeve, me një shkallë letaliteti prej 26.7%.
Ramadani ka theksuar se sivjet në Klinikën Infektive ka pasur 55 raste të dyshuara për EHCC, prej të cilave vetëm një ka rezultuar pozitiv dhe ky rast ka qenë nga komuna e Gjakovës. Ai ka prezantuar edhe aktivitetet e realizuara nga Ministritë, pushteti lokal dhe AVUK, bashkë me komunat në kuadër të Planit operativ për parandalimin dhe luftimin e EHCC si dezinsektimi selektiv, repelimi i shtazëve, marrja e mostrave të gjakut, fushatat edukative-vetëdijesuese, etj.
Doajeni i shëndetësisë publike në Kosovë, epidemiologu Isuf Dedushaj, tha se investimi në parandalim është masë shumë praktike dhe profitabile për parandalimin e sëmundjeve ngjitëse, ndërkohë që përgëzoi qytetarët e Malishevës për angazhimin që përkundër rreziqeve, ja ka dalë me një problematikë të madhe, në koordinim me akterët e të gjitha niveleve që kanë kontribuar.
Në këtë takim të Këshillit Ndërministror për luftimin dhe parandalimin e EHCC u bë shqyrtimi edhe i masave për sezonin 2017 për të gjitha institucionet që përfaqësohen në Këshill, përkatësisht në luftën kundër Etheve Hemorragjike Krime-Kongo. /PrizrenPress.com/