Para se të bëhej e famshme, Jennifer Lopez, për pak kohë ishte e pastrehë. Ajo për disa muaj kishte fjetur në një shtrat në studion e saj të vallëzimit, por në fund i ka buzëqeshur fati duke u bërë një këngëtare dhe aktore e famshme. Por ajo nuk është e vetme në këtë, pasi edhe shumë të famshëm të tjerë e kanë shijuar jetën e të pastrehut para se të gjenin famën. Kur ishte vetëm 20 vjeçe, Carmen Electra-n e kishte plaçkitur i dashuri me të cilin ishte në lidhje dhe e kishte lënë pa asgjë.
“Qëndroja ulur në një park dhe qaja pse i kisha lejuar atij të ma bëjë këtë”, ka rrëfyer Electra.
Para se të fitonte në garën “American Idol”, Kelly Clarkson për një kohë kishte jetuar në veturën e saj, sepse banesa i ishte djegur nga zjarri. Ajo çdo ditë kishte shkuar në palestër në të cilën ishte anëtare, për të bërë dush. Halle Berry kishte jetuar në një objekt për të pastrehët kur ishte 21 vjeçe dhe kur mundohej të bëhej e njohur në Hollivud, edhe pse e ëma e saj e kishte kundërshtuar këtë.
“Pas dy muajve kam mbetur pa para dhe e kam thirrur nënën që të më dërgojë para, por ajo ka refuzuar. Më ka thënë ose të gjindem disi, ose të kthehem në shtëpi. Isha shumë e zemëruar. Pas kësaj nuk kemi folur për një vit”, ka treguar ajo.