E mërkura do të jetë një ditë speciale në Ligën e Kampionëve. Në fakt, vëllezërit Xhaka do të përballen në mes vete në ndeshjen ndërmjet Arsenalit dhe Baselit.
Madje, edhe uebfaqja zyrtare e UEFA-s ia ka kushtuar një shkrim të veçantë vëllezërve nga Kosova, shkruan Zëri.
“Ishte Baseli prej ku Granit Xhaka doli në skenën e futbollit si adoleshent në mes viteve 2010 e 2012, duke e ndihmuar ekipin zviceran ta eliminonte nga Liga e Kampionëve një ekip si Manchester United”, shkruan fillimisht uefa.com, përcjellë Zëri.
“Tash, pasi iu bashkua Arsenalit nga Borussia Monchengladbachu, mesfushori e sheh veten kundër kampionit zviceran për herë të parë. Xhaka pa dyshim është në formë tek Arsenali pasi ka realizuar gola të bukur ndaj Hull City e Nottingham Forest dhe, si në Evropian kur Zvicra luajti kundër Shqipërisë, ai do të përballet përsëri me vëllanë e tij Taulantin si kundërshtar, në ndeshjen e vlefshme për Grupin A të Championsit”, ka përfunduar shkrimi i shtëpisë së futbollit evropian. /Zëri/