Sot fillon festivali i njohur International Film Festival Rotterdam në kuadër të të cilit do të mbahet edhe punëtoria pesë ditore Rotterdam Lab, e cila fillon me 28 janar 2017, shkruan “Zeri.info”.
Këtë vit falë partneritetit që QKK ka krijuar me Rotterdam Lab, punëtorisë do t’i bashkëngjiten edhe dy producent, producenti Yll Uka nga projekti filmik ‘Zgjoi’ dhe producenti Casey Cooper Johnson nga projekti filmik ‘Zana’.
Punëtoria Rotterdam Lab ka për qëllim avansimin e producentëve në zhvillim nga e gjithë bota dhe krijimin e mundësive për njohuri dhe ekspertizë. Kjo punëtori është e organizuar nga tregu për bashkëprodhim ‘CineMart’, i njohur si tregu joformal i filmit, i ndjekur nga një numër i madh i profesionistëve ndërkombëtar të filmit, të cilët janë të interesuar të investojnë në projekte të reja filmike.
Ky program përfshin diskutime dhe punëtori me ekspertë nga industria e filmit. QKK është shumë e interesuar të vazhdoj këtë platformë bashkëpunimi për zhvillimin e producentëve kosovar dhe për më tepër, në mes të muajit dhjetor QKK bashkë me tre producent ishin pjesë e Coproduction Market në festivalin e madh në Francë ‘Festival de Cinema Europeen Des Arcs’.
Kjo ngjarje mbahet në Bourg Saint Maurice – Les Arcs dhe sjell çdo vit më shumë se 19,000 spektator dhe më shumë se 1 mijë profesionistë me qëllimin e promovimit dhe zhvillimit të kualitetit dhe diversitetit në filmbërje. /Zëri/