Në Kukës, reshjet e shiut kanë krijuar vështirësi në qarkullimin e automjeteve në “Rrugën e Kombit”, ku ka pasur edhe rënie gurësh nga skarpatet.
Kompania e mirëmbajtjes së rrugës është angazhuar për pastrimin e segmentit nga gurët, ndërsa punëtorët po punojnë për mbajtjen e situatës nën kontroll.
Drejtuesit e automjeteve këshillohen që të jenë të kujdesshëm për shkak të pranisë së madhe të ujit në rrugë.
24 orët e fundit, në zonat malore janë rikthyer reshjet e dëborës, të cilat kanë ndikuar edhe në uljen e temperaturave minimale deri në zero. Në fshatrat e njësive administrative Shishtavec, Topojan e Zapod ka patur reshje të lehta dëbore të shkrirë.
Nga dita e premte pritet një përmirësim i motit dhe rritje e temperaturave. Reshjet e fundit kanë ndikuar edhe në përmirësimin e situatës hidrike në liqenin e Fierzës, ndërkohë që pritet një rritje e nivelit në ditët në vijim.