Gjykimi i paraparë të mbahej të enjten ndaj kryetarit të Komunës së Dragashit, Salim Jenuzi, dy zyrtarëve tjerë të kësaj komune, Bean Haxhihasani dhe Vetim Hasani, nuk është mbajtur sepse ka munguar i akuzuari i katërt, Nexhat Selaj.
Kryetarja e trupit gjykues, Ajser Skenderi, ka thënë se i akuzuari Selaj gjatë seancës së kaluar është njoftuar gojarisht për shqyrtimin e sotëm, por i njëjti nuk e ka arsyetuar mungesën e tij.
Andaj, në mungesë të kushteve ligjore, trupi gjykues ka shtyrë gjykimin ndaj kryetarit të Dragashit për 3 korrik 2017, në ora 9:00, dhe ka lëshuar urdhër për sjellje me forcë ndaj të akuzuarit Nexhat Selaj.
Ky rast zhvillohet në bazë të aktakuzës së Prokurorisë Themelore në Prizren, e cila e akuzon Salim Jenuzin, se duke qenë kryetar i Komunës së Dragashit, në periudhën 2009-2016, i ka mundësuar Nexhat Selajt përvetësimin e pronës komunale, të cilën ky e kishte uzurpuar paraprakisht.
Poashtu, Bean Haxhihasani, akuzohet se në cilësinë e drejtorit të urbanizmit në Komunën e Dragashit, ka lëshur vendim me të cilin i është lejuar Nexhat Selajt, që të ndërtojë objektin afarist në pronë komunale.
I akuzuari tjetër, Vetim Hasani, akuzohet se duke qenë inspektor i ndërtimit në Komunën e Dragashit, nuk ka vepruar për të ndërprerë ndërtimin e objektit afarist të Nexhat Selajt, me material të përhershëm.
Ndërsa Nexhat Selaj akuzohet se gjatë periudhës 2009-2016, ka uzurpuar në mënyrë të paligjshme pronën komunale të Komunës së Dragashit, në të cilën ka ndërtuar objekt afarist me karakter të përhershëm, megjithëse kishte leje për shfrytëzim të përkohshëm./betimiperdrejtesi/