Totò Riina mund të lirohet nga burgu për “të vdekur me dinjitet”.
Gjykata e Lartë në Itali pranoi për herë të parë kërkesën e palës mbrojtëse të ish kreut të Cosa Nostra-s, tashmë 87 vjeç dhe me disa sëmundje të rënda, për shtyrje të dënimit ose konvertim, për ta kryer në banesë.
Mbrojtja argumentoi se tashmë Riina, i dënuar me burg përjetë, nuk është më i rrezikshëm për shoqërinë për shkak të moshës dhe gjendjes së tij shëndetësore, raportojnë mediat italiane.
“E drejta për të vdekur me dinjitet i takon çdo të burgosuri” vlerësoi Gjykata e Lartë, që me pranimin e kërkesës i hap rrugë lirimit nga qelia të një prej mafiozëve më të njohur të historisë botërore. Tashmë, vendimi final për të lënë të lirë ish “kokën” e Cosa Nostra-s i takon Gjykatës së mbikëqyrjes në Bologna.
Kjo e fundit, më 22 mars refuzoi konvertimin e dënimit të ish mafiozit. Në këtë vendim, sipas Gjykatës së Lartë, nuk është marrë parasysh gjendja e përgjithshme e të burgosurit dhe kushtet e tij që sa vijnë e përkeqësohen.