Dy institucione e kanë bërë hapin e parë të përbashkët drejt finalizimit të idesë për ta bërë qytetin e Prizrenit me muze në të cilin do të shpaloset historia hebraike dhe ajo shqiptare.
Për renovimin e objektit që, sipas planit, do të shndërrohet në muze shqiptaro-hebraik, Ministria e Kulturës, Rinisë e Sportit do t’i investojë 50 mijë euro, shkruan sot Koha Ditore.
Mjetet janë ndarë, edhe me buxhetin e këtij viti për këtë projekt tashmë është nënshkruar edhe një memorandum midis MKRS-së dhe Komunës së Prizrenit.
Sipas marrëveshjes së nënshkruar nga sekretari i përgjithshëm i MKRS-së, Veton Firzi, e kryetari i Komunës, Ramadan Muja, ky projekt do të realizohet gjatë viteve 2017/2018.
Objekti që do të rinovohet ndodhet brenda Qendrës Historike të Prizrenit dhe në dhjetor të vitit 2016 i qe dhënë në shfrytëzim Bashkësisë Hebraike të Kosovës, nga kryetari i Komunës së Prizrenit, në seancën e fundit të vitit të Kuvendit Komunal.