Për Këshillin e Bashkësisë Islame asnjë objekt tjetër në hapësirën e Kalasë së Prizrenit nuk mund të krahasohet me xhaminë e dikurshme aty për sa u përket fakteve. Dhe këto fakte, sipas KBI-së në Prizren, janë aq kategorike saqë organet qeveritare nuk mund t’i mbyllin sytë para tyre, shkruan sot Koha Ditore.
Këtë qëndrim KBI-ja e ka shpalosur të premten duke reaguar ndaj vendimit të javës së kaluar të Institutit të Kosovës për Mbrojtjen e Monumenteve, me të cilin është refuzuar kërkesa për rindërtimin e xhamisë në Kalanë e Prizrenit. Madje autoriteti fetar lokal ka shprehur keqardhjen që ky vendim ka krijuar terren për revoltim të besimtarëve myslimanë.
“Natyrisht, ky vendim nuk është i mirë për askënd, sepse ka injoruar faktet historike, argumentet autentike dhe vullnetin e qytetarëve të Prizrenit. Ne jemi të bindur se edhe vetë Instituti, si organ i Ministrisë së Kulturës, nuk i beson këtij vendimi, që vetë e ka lëshuar”, thuhet në reagimin e KBI-së.