Në qendër të qytetit të Prizreni, përkrahësit e Vetëvendosjes dhe partnerëve të koalicionit, Nismës për Kosovën dhe Lidhjes Demokratike të Kosovës kanë festuar fitoren e Mytaher Haskukës.
Kryetari i Qendrës së Lëvizjes Vetëvendosje Artan Abrashi në hapje të këtij tubimi tha se bashkë me festën e Flamurit “ po e festojmë edhe fitoren për ndryshimin në Prizren”.
Deputeti Zafir Berisha, kryetar i Degës së Nismës në Prizren duke uruar festat e nëntorit tha se “Prizreni sot ka festën e fitores mbi hajdutët dhe kusarët.” Berisha në fjalën e tij tha se qytetarët e Prizrenit treguan kulturë të lartë politike, ndërsa shtoi se Mytaher Haskuka me ekipin e tij do të jetë në shqrbim të qytetarëve.
Kryetari I Prishtinës Shpend Ahmeti fitoren e Mytaher Haskukës në Prizren e quajti fitore të zhvillimit, fitore kundër krimit.
“Ditë të mira po vijnë për Prizrenin dhe ditë të këqija po vijnë për krimin” tha Ahmeti.
Kryetari I Lëvizjes Vetëvendosje Visar Ymeri fitoren e Mytaher Hakukës e quajti çlirim nga krimi.
“Mytaheri do të jetë kryetar ndryshe I Prizrenit” tha Ymeri.
Mytaher Haskuka i falënderoi qytetarët për fitoren e madhe. Ai falënderoi aktivistët e Lëvizjes Vetëvendosje në Prizren, deputetët ndërsa tha se një falënderim i veçantë i takon Zafir Berishës.
“Fitorja jonë e përbashkët është fitore kundër krimit të organizuar. Kjo fitore e jona dëshmon se nëse jemi të bashkuar s’ka kush na ndal. Me 19 nëntor qytetarët u bashkuan me zemër dhe treguan se mund ta bëjnë ndryshimin. Edhe përkundër blerjes së votës fituam bashkë” tha Haskuka.
Ai kërkoi mbështetjen e qytetarëve që së pari të vihet rend në Komunë e më pas të realizohen zotimet e tij.
“ju e meritoni një jetë me dinjitet” tha Haskuka./Gazetaere.com/