Zyrtari policor Kujtim Kryeziu, i akuzuar për “marrje ryshfeti”, e ka pranuar fajësinë, të martën, në Gjykatën Themelore në Prizren.
I akuzuari Kujtim Kryeziu, pas konsultimit me mbrojtësin e tij, avokatin Bestar Kolgeci, ka vendosur që ta pranoi fajësinë për veprën penale që i ngarkohet me aktakuzë.
Këtë pranim të fajësisë e kanë kundërshtuar prokurori Mehdi Sefa dhe mbrojtësi i të akuzuarës tjetër Lindita Haxhaj, avokati Labinot Berisha, pasi që në aktakuzë thuhet se në bashkëkryerje e kanë kryer këtë vepër penale.
Por kundërshtimin e tyre, trupi gjykues nuk e ka konsideruar si arsye për mos aprovimin e pranimit të fajësisë nga i akuzuari Kryeziu, me ç’rast shqyrtimi ka vazhduar me fjalët hyrëse të palëve në procedurë.
E akuzuara tjetër për marrje të ryshfetit, Lindita Haxhaj, nuk e ka pranuar fajësinë, duke mohuar se ka marrë para nga i dëmtuari Sinan Gashi, apo nga kolegu i tij, Kujtim Kryeziu, që ishin në patrullim.
E akuzuara Haxhaj, ka deklaruar se kundërvajtësin Sinan Gashi, e kishte ndalur pasi që po qarkullonte me makinë pa autorizim, por më pas sipas saj, ka ardhur kolegu i saj Kujtim Kryeziu, i cili thotë t’ia ketë marrë dokumentet, duke mos i treguar se çka ka ndodhur më pas.
Ajo ka deklaruar se ditën për të cilën akuzohet, i kishte vetëm 5 euro dhe këtë mund ta dëshmojnë shefi i ndërrimit Muhamet Ilazi, apo edhe kamerat e lokalit ku thotë se ka qenë duke pirë kafe.
Fjala përfundimtare në këtë rast, është caktua më 26 dhjetor 2017, në ora 13:30.
Në shqyrtimin fillestar që ishte mbajtur më 2 tetor të këtij viti, të dy këta zyrtarë policorë ishin deklaruar të pafajshëm për akuzën që u vihej në barrë.
Zyrtarët policorë Kujtim Kryeziu dhe Lindita Haxhaj, akuzohen se më 3 shkurt 2017, në Prizren, kanë ndaluar një qytetar për kundërvajtje dhe nga i njëjti kanë kërkuar ryshfet për të mos i shqiptuar dënimin me gjobë.
Sipas aktakuzës, i akuzuari Kujtim Kryeziu i ka thënë qytetarit të ndaluar që të vendosë 15 euro në librezën e makinës dhe t’ia sjellë atij.
Sipas aktit të akuzës, pasi që qytetari ka vepruar sipas udhëzimeve, ai është liruar të vazhdojë rrugën pa u dënuar.
Kujtim Kryeziu, nga paratë e marra, siç thuhet në aktakuzë, ia kishte dhënë 5 euro të akuzuarës Lindita Haxhaj.