Në Malishevë dhe në Bubavec janë përkujtuar të rënët e 30 janarit të vitit 1990, apo si njihet edhe si “Masakra e Malishevës”, ku humbën jetën Hisni Mazreku dhe Ali Kryeziu, ndërsa ishin plagosur edhe dhjetëra të tjerë.
Në shënim të kësaj dite, homazhe dhe nderime, krahas familjarëve, kanë bërë edhe i pari i Komunës së Malishevës, Ragip Begaj, i shoqëruar nga zyrtarët tjerë të qeverisë komunale, zëvendësministri i kulturës, Rexhep Mazreku, figura të tjera si dhe qytetarë të shumtë.
“Kjo ishte një ngjarje e rëndë, e këso vrasje bëheshin thuajse çdo ditë në Kosovë, por organet komunale të Malishevës, ishin të parat, që pa marrë parasysh pasojat kolektive apo individuale, kishin reaguar për këtë vrasje të bërë në qendër të Malishevës, në pikë të ditës dhe kjo shënon rastin e parë të reagimit të institucionit, ku ish drejtuesit e asaj kohe, reaguan ashpër dhe në mënyrë institucionale, ndaj vrasjeve”, tha kryetari i Malishevës gjatë homazheve në vendin e rënies, në qendër të qytetit të Malishevës.
Më 30 janar të vitit 1990, forcat policore, kanë hapur zjarr mbi qytetarët e pafajshëm, duke vrarë tre persona, Ali Kryeziun dhe Hisni Mazrekun, si dhe një person tjetër, i cili asnjëherë nuk u identifikua ndërsa ishin plagosur shumë qytetarë të tjerë, në Malishevë dhe në fshatrat përreth.