Themelore e Prizrenit ka hedhur poshtë aktakuzën e Prokurorisë ndaj tre zyrtarëve komunalë dhe dy personave tjerë për tri vepra të ndryshme penale për shkak të mungesës së mjaftueshme të provave.
Në aktvendimin lidhur me këtë rast Gjykata ka bërë të ditur se i ka aprovuar si të bazuara kërkesat e të akuzuarve Bujar Hasani (ish-drejtor i Inspektoratit të Komunës së Prizrenit), Enver Bytyqi (inspektor në Komunë) e Florim Islamaj (inspektor në Komunë), si dhe të personave me inicialet B.B. dhe A.O., përkatësisht të mbrojtjes së tyre, për hedhjen e aktakuzës së ngritur nga Prokuroria Themelore e Prizrenit në nëntor të vitit të kaluar, shkruan sot Koha Ditore.
“Hidhet aktakuza e Prokurorisë Themelore në Prizren, Departamenti i Krimeve të Rënda të datës 7 nëntor 2017. Pushon procedura penale ndaj të akuzuarve Bujar Hasani, Enver Bytyqi, Florim Islamaj për shkak të veprës penale keqpërdorimi i pozitës apo autoritetit zyrtar, të akuzuarit B.B. për shkak të veprës penale uzurpimi i paligjshëm i pronës së paluajtshme dhe A.O. për shkak të veprës penale vetëgjyqësia…, sepse nuk ka prova të mjaftueshme që të mbështetet një dyshim i bazuar mirë se të pandehurit kanë kryer veprat penale sipas aktakuzës”, shkruan në aktvendimin e Gjykatës Themelore të Prizrenit, të cilën e ka parë gazeta.