Kalaja është anëtare e re e IP Superligës së Kosovës në basketboll. Skuadra prizrenase e ka fituar edhe ndeshjen e dytë ndaj Boreas, këtë herë me shifrat 99:80, derisa në ndeshjen e parë në Pejë pati fituar me rezultat 93:84.
Në këtë mënyrë, në edicionin e ardhshëm Prizreni do t’i ketë dy skuadra në elitën e basketbollit kosovar. Xavier Newson me 30, Ujkan Karanezi me 28 dhe Edmond Kryeziu me 25 pikë ishin më të merituarit për fitoren e prizrenasve.
Në anën tjetër, në radhët e pejanëve më efikasi ishte Bujar Qeku me 22 pikë. Me lojë të mirë u dalluan edhe Qëndrim Gashi me 19 e Allen Idrizaj me 17 pikë, por që nuk mjaftuan për të shmangur humbjen. Në këtë mënyrë, Borea pas vetëm një viti e përfundoi aventurën në IP Superligë.