Drita nesër takohet me Lirinë dhe pret të shënojë fitoren e radhës në rrugën drejt titullit të kampionit. Për kapitenin e Dritës dhe futbollistin e Përfaqësueses së Kosovës, Ardian Limani, kjo përballje është mjaft e rëndësishme. “Ne respektojmë Lirinë pasi është skuadër mjaft e mirë.
Në këtë ballafaqim duhet të marrim maksimumin, sepse çdo gabim na kushton dhe na humb tërë mundin e këtij kampionati.
Ndeshjes do t`i hyjmë me një qetësi maksimale dhe do të jemi të freskët. Kemi pasur gjatë këtyre tri javëve ndeshje shumë të ngarkuara, por ne po ecim drejt synimit tonë të përbashkët me tifozët tanë ‘Intelektualët’, të cilët janë inspirimi ynë ndeshje pas ndeshje, ndërsa alternativë tjetër përpos fitores nuk kemi”. ka bërë të ditur kapiteni i Dritës. Skuadra e tij e kryeson renditjen me 60 pikë, tri më tepër se Prishtina që është e dyta.