Lideri i LDK-së, Isa Mustafa i ka dërguar edhe një herë ‘selam’ liderit të PDK-së, Hashim Thaçit, që të harrojë sa më shpejt Prizrenin. Ai tha se qyteti i Prizrenit pas zgjedhjeve të 3 nëntorit do të qeveriset nga kandidati i LDK-së, Eqrem Kryeziu. “Thaci nuk ka shancë me e fitu Prizrenin. Unë nga këtu po i them që mos të mundohet më shumë, sepse Prizreni do të qeveriset nga LDK-ja”, tha ai.
Mustafa të dielën bashkë me kandidatin për kryetar të Prizrenit, Eqrem Kryeziun dhe kandidatë për Asamblenë Komunale ka shëtitur pirë kafe në sheshin “Shatërvan” në Prizren.
Mustafa është shprehur i bindur se kandidati i LDK-së, Eqrem Kryeziu do t’i fitojë zgjedhjet në Prizren. “Që sot mund ta quaj Kryeziun kryetar të Prizrenit”, tha Mustafa. Sipas tij, Prizreni e meriton një qeverisje më të mirë.
Kandidati i LDK-së, për kryetar të Prizrenit, Eqrem Kryeziu, tha ndërkaq se vetë qytetarët e Prizrenit po dëshirojnë që të ketë ndryshime. “PDK-ja kur erdh në pushtet pat premtuar ndryshime. Ata jo që nuk i kanë bërë ato ndryshime, por e kanë harru krejt këtë premtim. Por qytetarët tash vetë po dojnë ndryshme në Prizren”, tha Kryeziu/PrizrenPress.com/