Kosova i ka mbijetuar një ofensive të fundit të ndeshjes dhe ka realizuar synimin për të cilin ka udhëtuar në Azerbajxhan, shkruan sot Koha Ditore.
Përfaqësuesja e Kosovës në futboll ka dalë e pamposhtur nga stadiumi olimpik në Baku, të premten mbrëma, duke nisur me pikë të fituar fushatën në Ligën e Kombeve. Barazimi pa gola (0:0) me Azerbajxhanin është vlerësuar rezultat i favorshëm për Kosovën, që kështu ka vazhduar ecurinë pozitive të rezultateve.
Loja që ka shfaqur Kosova nuk është vlerësuar të jetë ajo që pritej, por “mbulesë” për të mundë të jetë pika e fituar ndaj kundërshtarit më të fortë të mundshëm në Ligën D të Ligës së Kombeve dhe rivalit të drejtpërdrejtë për vendin e parë në Grupin e Tretë të kësaj lige.
Në Grupin e Tretë të Ligës D bëjnë pjesë edhe Ishujt Faroe e Malta, që janë përballur po ashtu të premten mbrëma. Të paktën në letër këto përfaqësuese vlerësohen kundërshtarë më të lehtë për Kosovën sesa Azerbajxhani. Kosova menjëherë të hënën në Prishtinë e pret përfaqësuesen e Ishujve Faroe, ndërsa shpresohet në fitoren e parë.