Alda Bardhyli ka studiuar letërsi në Universitetin e Tiranës. Ajo është e njohur si gazetare dhe kritike e letërsisë.
Prej vitesh ajo punon në fushën e botimeve si drejtuese e “Shtëpisë Botuese Saras” dhe tashmë e Botimeve UET PRESS. Ajo është drejtore e Qendrës së Studimeve Shqipe Kadare, ngritur pranë Universitetit Evropian të Tiranës, shkruan sot “Koha Ditore”.
Organizatore e “Letërsia dhe qyteti”, një projekt që ka në qendër letërsinë dhe autorët shqiptarë, i cili prej dy vjetësh e ka kthyer letërsinë faktor në hapësirat shqiptare. Së fundmi ajo është autore e librit “Maks Velo, jetë paralele”, ku për herë të parë në historinë e vendeve ish-komuniste është botuar dosja e plotë e përndjekjes, hetimit dhe burgosjes së një artisti.
Libri është një rrëfim i jetës në dy kohë, një sipas dosjes së Sigurimit të Shtetit dhe një sipas rrëfimeve që artisti i bën Bardhylit.
Bardhyli është personazhi i kësaj jave që rrëfehet në rubrikën e përjavshme “7 Shkronjat” në “E diela e Koha Ditore”.
E zeza. Gjithnjë më ka pëlqyer e zeza. E zeza është ngjyra më e fuqishme, përmbledh e nuk përjashton asnjë ngjyrë, kështu thonë japonezët.
Herët kam kuptuar se ti mund të ndërtosh figurat që do brenda një errësire, ose mund të ecësh përmes saj për të gjetur rrugë të reja…