Dy boksierët e pamposhtur të peshës së rëndë, britaniku Tyson Fury dhe amerikani Deontay Wilder, që më 1 dhjetor do të duelojnë për titullin kampion bote që mbahet nga ky i fundit, kanë mbajtur sot në Nju Jork konferencën e dytë për shtyp, për të promovuar këtë event të rëndësishëm të sportit të dorezave.
Pas spektaklit që dhuruan 24 orë më parë në Londër, ku pati edhe tension e shtyrje mes dy sportistëve, ata sot ishin sërish “face to face” e sërish nuk mungoi tensioni.
Në një moment, dy boksierët u afruan afër njëri-tjetrit, duke thumbuar e akuzuar njëri-tjetrin, por këtë herë ata nuk shkuan deri te sherri. Madje më shumë qeshnin, duke lënë të kuptosh se ai incident i konferencës së parë ishte më së shumti për të shtuar audiencën.
Sërish të dy boksierët pretenduan fitoren, ndërkohë që pas 24 orësh ata do të zhvillojnë edhe një konferencë të tretë për shtyp, këtë herë në Los Anxhelos, aty ku do të zhvillojnë duelin më datën 1 dhjetor.