Një prind, fëmija i të cili zhvillon mësimet në shkollën fillore “Lekë Dukagjini” në Prizren është shprehur i shqetësuar.
Në adresë të portalit Koha.net ai ka dërguar fotografi në të cilat shfaqet gjendja në oborrin e shkollës, derisa ky prind ka thënë se kësisoj është pothuajse çdo ditë.
Sipas tij, prindër të pandërgjegjshëm futen në oborrin e shkollës kur të vijnë për të marrë fëmijët e tyre nga mësimi, derisa ka shtuar se kjo po u ngjall frikë për ndonjë fatkeqësi eventuale
Sipas tij, situata është aq e keqe saqë fëmijët ecin edhe në pjesë të cilat nuk janë të dedikuara për të ecur, mbi bar, derisa në vendin për këmbësorë parkohen vetura.
Fotografitë thotë se i ka bërë sot, saktësisht në orën 16:25, me shpresën se autoritetet kompetente do të ndërmarrin masa për ofrimin e sigurisë për nxënësit brenda ambientit të shkollës.
