Organet e ekzekutivit të Malishevës ende nuk e kanë zbatuar vendimin për largim të billbordeve e reklamave rreth Sheshit të Dëshmorëve në Malishevë, shkruan sot “Koha Ditore”.
Sipas arsyetimit të ekzekutivit lokal për këtë çështje nevojitet qartësimi i disa detajeve teknike, që nuk figurojnë në vendimin e marrë nga anëtarët e Kuvendit të Komunës së Malishevës. Ky vendim ishte miratuar rreth katër muaj më parë.
Moszbatimi i këtij vendimi rishtazi ka shtyrë qendrën e Lëvizjes Vetëvendosje në Malishevë që me një letër t’u drejtohet kryetarit Ragip Begaj dhe drejtorit të Shërbimeve Publike, Milazim Morina me kërkesën për zbatim të vendimit të sipërpërmendur.
Në letrën e nënshkruar nga kryetari i qendrës së Lëvizjes Vetëvendosje në Malishevë, Adem Berisha, shkruan se “me datën 7 shkurt 2019, Kuvendi i Komunës ka marrë vendim për largimin e të gjitha billbordëve (hapësirave reklamuese) brenda dhe për rreth Sheshit të dëshmorëve në Malishevë”.
