Shqetësimet dhe kërkesat e qytetarëve lidhur me emërtimin e rrugëve, shesheve e lagjeve do të shqyrtohen nga organet komunale të Prizrenit. Një gjë e tillë, sipas pushtetit lokal, do të bëhet në fillim të muajit të ardhshëm, kur do të mblidhet Komisioni për plotësim-ndryshimin e emërimit të rrugëve, shesheve dhe lagjeve të qytetit.
Ky komision ditë më parë ka mbajtur mbledhjen konstitutive, në drejtimin e kryesuesit të Kuvendit, Artan Abrashi. Në këtë mbledhje, sipas njoftimit të Komunës, kryesues i Komisionit është zgjedhur Karanfil Haxhillari (LVV), ndërsa zëvendëskryesues Azem Durmiši (NDS), shkruan sot Koha Ditore.
“Pas zgjedhjes së drejtuesve të komisionit, u diskutuan çështjet që lidhen me emërtimin e rrugëve dhe shesheve, si dhe pakënaqësitë dhe vërejtjet e qytetarëve nga emërtimet e bëra nga komisioni i kaluar, me qëllim që problemet e njëjta të mos përsëriten”, thuhet në komunikatën e Zyrës për Informim të Komunës së Prizrenit.
Aty gjithashtu sqarohet se në mbledhjen e radhës të këtij komisioni do të shqyrtohen kërkesat e qytetarëve për ndryshimin e emërtimit të rrugëve.