Kandidati i PK-së për kryetar të Prizrenit, Beni Kizolli,prezantoi projektin “Tenderi i Bardhë”. Ai tha se ky projekt ka për qëllim parandalimin e keqpërdorimeve dhe manipulimeve.
“Qeveria aktuale gjithmonë është munduar të manipulojë me proceset e tenderit, sidomos kur bëhet fjalë për transparencë dhe qasje në dokumente publike”, tha Kizolli.
“Duke u nisur nga ky fakt ne si PK- një rëndësi të veçantë do t`i kushtojmë projektit “Tenderi i Bardhë”, i cili si qëllim ka parandalimin e keqpërdorimeve dhe manipulimeve, dhe njëkohësisht siguron transparencën para qytetarëve”.
Ai tha se me anë të këtij sistemi aplikimi nuk do të bëhet me anë të zarfeve, por me një sistem elektronik.
Edhe kandidati për Kuvendin e Prizrenit nga lista e PK-së Nderim Pasuli tha se me këtë projekt do të parandalohen keqpërdorimet dhe animet gjatë tenderimit për grupet e caktuara të interesit. “Proceset do të monitorohen që nga periudha e aplikimit deri në kohën e mbylljes dhe me përfundimin e afatit të aplikimit rezultatet do të publikohen në mënyrë automatike dhe elektronike edhe në ekranin e madh publik që gjendet në qendër të qytetit”
“Qëllimi i këtij projekti është të sigurojmë shërbim sa më të ndershëm dhe transparent ku do të fitojnë ofertat më të mira dhe adekuate duke u bazuar në principet profesionale”/PrizrenPress.com/