Nënkryetarja e LDK-së, Vjosa Osmani ka folur lidhur me marrëveshjen me Vetëvendosjen, e cila përfundimisht u arrit sot.
Osmani ka përsëritur se numri i ministrive do të shkojë deri në 15, ndërsa gjatë ditës do të diskutojnë rreth emrave për përbërjen e ekzekutivit qeveritar, njofton Klan Kosova.
”Kryeministri i Kosovës që votohet nesër është nga Vetëvendosje”.
”Ne sot në Këshillin e Përgjithshëm diskutojmë vetëm marrëveshjen në parim, sa i përket emrave ndërkohë sot gjatë ditës do të ulemi e të diskutojmë. Është proces që nuk merr shumë kohë, por ka diskutimet që janë të domosdoshme që e gjithë partia të jetë e konsultuar. Shumë shpejt do t’i kemi ata emra dhe tërë përbërjen e Qeverisë”.
”Për mua personalisht tejet me rëndësi që vullneti i qytetarëve të 6 tetorit të realizohet. Shpresoj që nesër ta kemi votimin e Qeverisë dhe realizimin e planit qeverisës që e kemi hartuar bashkë me LVV sepse nuk janë aq me rëndësi emrat aq sa do të jetë puna që do e bëjmë”.
A do ta pranoni postin e Kryetarit të Kuvendit dhe ku do të jetë Vjosa Osmani në këtë mandat qeveritar?
”Meqë kam qenë kandidate për kryeministre nga ana e LDK-së, kemi diskutuar se ku mund ta shihja unë veten ndaj dhe e shoh vendin ku mund të kontribuojë më shumë për qytetarët, aty ku mund të jap më së shumti kontribut për qytetarin, aty do të jem”.
”Sot më e rëndësishmja është që zotimet lidhur me zgjidhjen problemeve të qytetarëve të çohen në vend. LDK ka qenë e gatshme të përballet me sfida të mëdha gjatë historisë së saj 30 vjeçare e do të jetë e gatshme të përballet edhe më tutje”.