Ditë më parë i prekuri i vetëm nga Suhareka me coronavirus ishte shëruar plotësisht duke larguar këtë komunë nga lista e atyre që kanë persona të prekur me coronavirus.
Instituti Kombëtarë i Shëndetit Publik ka njoftuar se sot edhe një qytetar tjetër nga kjo komunë rezulton i prekur nga coronavirusi.
Kryetari i Komunës së Suharekës, Bali Muharremaj ka thënë për RTV Dukagjinin se qytetari i prekur së fundmi është rast kontakti dhe jo rast i ri.
“I kemi edhe tetë anëtarë të kësaj familje që duhet të kryejnë testet. E kemi edhe një familje tjetër të dyshuar që kanë pasur kontakte me personin e rezultuar së fundmi me coronavirus”, tha ai, përcjell Telegrafi.
Muharremaj thotë se në bazë të informacioneve personi i prekur me coronavirus ka mbetur në Banjë të Malishevës nga ku edhe mendohet se ka marrë coronavirusin.
Sipas Muharremajt i prekuri nga Suhareka ka lidhje familjare me një familje nga Banja e Malishevës.
“Qytetarët duhet ta kuptojnë se është në të mirën e tyre te respektojnë udhëzimet e institucioneve dhe të mos bëjnë vizita të ndërsjella te familjarët”, tha ndër të tjera Bali Muharremaj./Telegrafi/