Giorgio Chiellini vlerëson se Mario Balotelli “ka merituar një shuplakë” për qasjen e tij gjatë kampanjës së Italisë në Kupën e Konfederatave të vitit 2013.
Italia pësoi 4:2 nga Brazili në fazën grupore të turneut, ndërsa përfundoj në vend të tretë. Mbrojtësi i njohur thotë se Balotelli nuk ka ndihmuar ekipin e tij gjatë asaj humbje të hershme.
Përzgjedhësi i Italisë, Roberto Mancini, ka thënë së fundi se dyert janë të hapur për kthimin e Balotellit. Sulmuesi ka luajtur vetëm tri ndeshje në pesë vitet e fundit.
“Balotelli është person negativ që nuk ka respekt për ekipin”, ka shkruar Chiellini në një autobiografi që do të botohet, ka raportuar “goal.com”.
“Në vitin 2013 në Kupën e Konfederatave, ndaj Brazilit, ai nuk na ka ndihmuar fare. Ai ka merituar një shuplakë. Dikush mendon që ai është në mesin e pesë lojtarëve më të mirë në botë. Unë asnjëherë nuk kam menduar se ai mund të jetë në mesin e dhjetë apo 20 më të mirëve”.
Chiellini ka shkruar edhe për ish-mesfushorin e Juventusit dhe Interit, Felipe Melo.
“Felipe Melo është edhe më i keq: më i keqi prej të këqijve. Nuk mund të qëndroj para njerëzve që nuk shfaqin respekt, para atyre që duan të shkojnë gjithnjë kundër të tjerëve. Ka pasur gjithnjë luftë me të. U kam thënë gjithnjë trajnerëve: ai është mollë e kalbur”.
Mbrojtësi Chiellini (35) është në fund të karrierës te Juventusi, për të cilën skuadër luan prej vitit 2005. Ai ka luajtur mbi 500 ndeshje për klubin, ndërsa i ka mbi 100 ndeshje për Italinë.
Chiellini ka shkruar edhe për Interin: “E urrej këtë skuadër si Michael Jordan urren Pistonsat. Është e pamundur mos të urresh atë”.