(E plotësuar) Në një ceremoni të organizuar në ditën e fundit të trajnimit “Trajno trajnerët të zhytjes” në pishinën e notit në Banjë të Malishevës, që është edhe një prej vend trajnimeve për zhytësit e FSK-së, u zhvillua aktiviteti i pranim dorëzimit të donacionit për FSK-në nga qeveria e Holandës.
Komandanti i FSK-së, gjenerallejtënant Kadri Kastrati pranoi donacionin nga ambasadori i Holandës në Kosovë, zotiri Robert Bosh(Robert Bocsh). Donacioni përbëhet prej disa pajisjeve të komunikimit nënujorë të zhytësve, mjete këto shumë të nevojshme për zhytësit e FSK-së për operacionet e veçanta nënujore.
Me rastin e pranimit të donacionit, Komandant Kastrati falënderoi qeverinë dhe popullin e Holandës për mbështetjen e vazhdueshme që po i bënë FSK-së në lëmin e zhytjes dhe ngritjen e kapaciteteve të kësaj njësie. Sidomos është e rëndësishme tha gjeneral Kastrati mbështetja e Qeverisë holandeze për faktin së FSK-ja, konkretisht Kompania e Kërkim Shpëtimit në ujëra, është në vijën e parë të reagimit në bazë Planit të Veprimit Kombëtarë, për këtë arsye mbështetja me pajisje të komunikimit e plotëson një nevojë të domosdoshme për funksionim operacional të suksesshëm.
Nga ana e tij ambasadori i Holandës,zotëri Bosh deklaroj se: “Ne kemi arritur të përgatisim mjeshtër të zhytjes, kemi përgatitë trajnerë të cilët do të trajnojmë më tutje pjesëtarët e kërkim shpëtimit në ujëra dhe se donacioni që po dhurojmë sot me pajisje të komunikimit ofron siguri për zhytësin dhe i jep siguri gjithë operacionit në ujë”. Ky trajnim përfundoi por nuk do të përfundon mbështetja e shtetit të Holandës për FSK-në, tha në fund ambasadori Bosh.
Pjesëtarët e kërkim – shpëtimit të FSK-së me këtë rast i demonstruan pajisjet e dhuruara dhe u shprehen të kënaqur me cilësinë e tyre.
Në këtë ceremoni ishin të pranishëm gjeneral brigade Gëzim Hazrolli, zëvendëskomandant i Komandës së Forcës Tokësore (KFT), kolonel Iljaz Dërguti komandant i Brigadës për Mbështetje Operacionale (BMO), kolonel Shaip Haziri, Komandant i Regjimentit të Mbrojtjes Civile (RMC) dhe kapiten Haki Hertica komandant i Task Forcës së Kërkim Shpëtimit.
Holanda dhuron FSK-së pajisje për zhytje, ceremonia mbahet sot në Banjë të Malishevës
Ministria e Forcës së Sigurisë organizon ceremoninë e dorëzim pranimit të donacionit të pajisjeve për zhytje nga Qeveria e Holandës. Ceremonia e dorëzim-pranimit të donacionit nga Qeveria e Holandës, do të mbahet sot nga ora 15:00, në Banjë të Malishevës saktësisht në vendin e trajnimit të zhytësve të FSK-së, pishinë.
Në ceremoninë e pranimit të donacionit, do të marrin pjesë; Komandanti i FSK-së, gjenerallejtënant Kadri Kastrati, ambasadori i Holandës në Republikën e Kosovës, Robert Bosch, si dhe zyrtarë dhe oficerë të lartë të MFSK-së, FSK-së, KFOR-it, dhe pjesëtarët e Njësisë së Zhytësve të FSK-së.