Të hënën, në Gjykatën Themelore në Prizren, dega në Suharekë është ndërprerë shqyrtimi gjyqësor në rastin ku Bexhet Bajraktari po akuzohet për kanosje ndaj Edon Bytyqi.
Ndërprerjen e procedurës e ka kërkuar Prokurori Shahadin Destani, i cili gjatë marrjes në pyetje të të dëmtuarit Bytyqi, ka hasur në elementet e një vepre tjetër penale.
Në pyetjen e prokurorit Destani se ’’a e njef të akuzuarin dhe çfarë raporte keni’’ i njëjti është përgjigjur se “e kam njohur prej kohësh, raportet i kemi pas të mira deri në momentin kur nga ai kam huazuar 300 euro dhe në emër të atij borxhi jam detyruar fillimisht të paguaj 320 euro e më pas ma ka marrë veturën “Alfaromeo” ku edhe vëllau nga Gjermania është detyruar ti paguaj 500 euro me qëllim që i njëjti të ma liroj veturën”.
Në pyetjen e prokurorit se “ju thatë se i keni pasur borxh Bexhetit ’’ i njëjti është përgjigjur se ’’ po i kam marr 300 euro nga Bexheti me fajde që për 5 ditë kam me i kthyer 600 euro” është përgjigjur i dëmtuari Bytyqi.
“Në momentin kur i keni marrë borxh, në çfarë gjendje ekonomike keni qenë”, ka pyetur prokurori Destani, i dëmtuari Bytyqi është përgjigjur se “kam qenë i pa punë, i gjendjes së dobët ekonomike”.
Pas këtyre deklaratave nga ana e të dëmtuarit dhe me kërkesën e prokurorit, gjyqtari i çështjes Robert Tunaj, ka ndërprerë shqyrtimin gjyqësor dhe ka obliguar Prokurorin që me akuzën e ndryshuar apo me hetimet e përmbyllura dhe rezultatet e këtyre, ta njoftoi gjykatën brenda afatit prej 60 ditësh.
Ndryshe, sipas aktakuzës së Prokurorisë Themelore në Prizren, i akuzuari Bexhet Bajraktari më 5 janar 2020, në Suharekë, saktësisht në qendrën tregtare “ETC”, seriozisht e kanosë të dëmtuarin Edon Bytyqi në atë mënyrë që pas disa mosmarrëveshjeve paraprake, ditën kritike derisa i dëmtuari ishte duke ngrënë bukë në vendin e lartcekur, i pandehuri afrohet, ia largon bukën dhe i drejtohet me fjalët “ mi jepe qelsat e veturës se po të kapi dhe të gjuaj nga gjami”, me ç’rast të dëmtuarit i shkakton frikë, ankth dhe pasiguri.
Me këto veprime dyshohet se ka kryer veprën penale “kanosje” nga neni 181 paragrafi 1 i KPRK-së. /BetimipërDrejtësi