Historiani Parim Kosova duke folur për 143 vjetorin e Lidhjes së Prizrenit ka treguar më shumë detaje historike për formimin e kësaj organizate politike dhe ushtarake.
“Sot u arrit që të shënohet 143 vjetori i Lidhjes Shqiptare të Prizrenit e cila është formuar në një kohë që ishte jashtëzakonisht dramatike jo vetëm për hapësirën shqiptare, por edhe për Europën Juglindore dhe Europën në tërësi për shkak që jemi në shekullin e formimit të kombeve dhe shteteve-kombe. Në vitin 1856 faktori ndërkombëtar kishte kaluar krizën e parë të madhe lindore dhe kishte filluar kriza e dytë lindore e viteve 1875-1878?.
“Vorbula e luftës ruso-osmane solli situata të palakmueshme ngase Perandoria Osmane e humbi luftën në Traktatin e Shën Stefanit sipas të cilit gjysma e tokave shqiptare i takonin Bullgarisë, Serbisë dhe Malit të Zi. Në këto rrethana dramatike të gjithë patriotët e asaj kohe të të gjitha trevave shqiptare u tubuan në Prizren dhe formuan organizatën politike dhe ushtarake – Lidhja Shqiptare e Prizrenit”.
Ai, në Info Magazine të Klan Kosovës, tha se të gjithë akterët politikë dhe ushtarakë që u tubuan në Prizren ishin njëzëri për shkak se mund të ndodhte që Shqipëria të mos ekzistonte më.
“Mbrojtja e tërësisë territoriale i bashkoi të gjithë shqiptarët. Arritën delegatët nga e gjitha hapësira shqiptare, formuan këtë organizatë politike dhe ushtarake, vepruan në fushën diplomatike, sensibilizuan çështjen shqiptare dhe në Kongresin e Berlinit dërguan peticione dhe memorandume të ndryshme. Duhet theksuar se Lidhja Shqiptare e Prizrenit arriti që përmes veprimtarive të saj dhe luftimeve të përgjakshme që zhvilloi në mbrojtje të tërësisë territoriale shqiptare detyroi faktorin ndërkombëtar që të revidojë edhe vendimet e Kongresit të Berlinit”.
Doktori i shkencave të historisë ka deklaruar se me veprimtarinë e Lidhjes Shqiptare të Prizrenit u sensibilizua çështja shqiptare.
“Fuqitë e mëdha nuk kishin qëndrim pozitiv për shqiptarët, pasi për ta ekzistonte Perandoria Osmane dhe populli shqiptar ishte nën robërinë osmane. Me veprimtarinë e Lidhjes Shqiptare të Prizrenit u sensibilizua çështja shqiptare, kështu që të gjithë konsujt në Prizren, Manastir, Janinë, Shkup e Shkodër njoftonin çdo orë ministritë e punëve të jashtme me të gjitha ngjarjet që ishin këtu”.
Ai ka pohuar se Lidhja e Prizrenit ishte bashkimi më i madh i shqiptarëve pas Kuvendit të Lezhës.