Gjatë ditës së nesërme në Gjykatën Themelore të Gjakovës, pritet të mbahet shqyrtimi fillestar ndaj të akuzuarit A.B., nga Tirana, Republika e Shqipërisë, i ngarkuar për veprën penale të dhënies së ryshfetit, raporton Drejtësia Sot.
A.B., do të përballet me këtë proces gjyqësor pasi që Prokuroria e Gjakovës, po pretendon se ai ka ofruar dhurata në mënyrë që personat zyrtar të mos veprojnë në pajtim me detyrën e tyre zyrtare.
Ndryshe, vlen të përmendet se kjo çështje penale pritet të gjykohet nga ana e gjyqtarit të Departamentit të Krimeve të Rënda, Shaqir Zika.
Ndërkaq, në aktakuzë theksohet se i akuzuari A.B., derisa ishte duke e drejtuar autobusin e llojit “Bulas Man”, në momentin e hyrjes në pikën kufitare, në çastin kur i njëjti e kishte ofruar dokumentacionin e autobusit për kontroll zyrtarëve të doganës, nga të njëjtit gjatë kontrollimit ishte vërejtur se kishte futur një kartëmonedhë prej 5 eurove, në këmbim që të kalonte më shpejtë kufirin.
Për këtë ai po akuzohet se ka kryer veprën penale dhënie e ryshfetit nga neni 422 parag.1 të KPRK-së.