Në Portugali sigurojnë se Barcelona po ndjek me interes të shtuar mesfushorin e Lille-s, Renato Sanches-in. Për mesfushorin ka interes të madh edhe nga Arsenal-i.
Pas transferimeve të Dani Alves-it dhe Ferran Torres-it, Barcelona kërkon të afrojë të tjerë lojtarë këtë merkato dimërore. Prioritet mbetet një sulmues, por nuk përjashtohen afrimet cilësore në repartet e tjera.
Portugezja “Eleven”, raporton se katalanasit po ndjekin situatën e Sanches-it dhe janë para Arsenal-it. Këta të fundit kanë ofruar 25 milionë euro për kartonin e ish-lojtarit të Bayern Munich-ut.
Edhe në verën e kaluar, emri i Sanches-it u përmend në listën e dëshirave të Barcelona-s. Por, ishin problemet financiare të katalanasve ato që çuan në mos rritjen e interesimit për lojtarin.
Megjithatë, shkëlqimi i mesfushorëve të rinj të Barcelona-s si Nico Gonzalez-i dhe Gavi, duket se e komplikon jo pak këtë situatë.
/Albanianpost.com