Ushtruesi i detyrës së Rektorit të Universitetit “Ukshin Hoti” në Prizren, dr. Zahadin Shemsedini, ka pritur të mërkurën në një takim përfaqësuesit e organizatës gjermane për bashkëpunim ndërkombëtar-GIZ.
Shemsedini tha se qëllimi i këtij takimi ishte themelimi i bashkëpunimit ndërmjet UPZ-së dhe Programit GIZ-CDBE.“Në këtë takim biseduam për shkëmbimin e punës dhe produkteve të CDBE-së me UPZ-në dhe ofrimin e mbështetjes në fushat e mundshme sa i parket programit të para-shërbimit (programin gjatë studimeve) të UPZ-së”.
“Një aspekt tjetër për bashkëpunim është mbështetja në hulumtime në fushën e edukimit në kuadër të këtij universiteti”. Të dy palët u pajtuan në parim që të vendoset bashkëpunimi në këtë aspekt, dhe pas diskutimit edhe të disa modeleve do të nënshkruhet në të ardhmen e afërt edhe momerandumi i mirëkuptimit.
“Është në interes të Universitetit që të përfitojë nga ky bashkëpunim”, tha Shemsedini.
Ai propozoi që në kuadër të projektit të futet edhe sigurimi i një ose dy lektorëve të gjuhës gjermane, “pasi që në UPZ është Programi i Gjuhës Gjermane, dhe se ka nevojë për lektor në këtë lëmi, dhe për krijimin e një manuali”.
Në këtë takim po ashtu lindi ideja edhe e sigurimit të ndonjë fondi për mbështetjen e UPZ-së për shtypjen e librave të profesorëve të Universitetit.
Edhe përfaqësuesit e GIZ u pajtuan parimisht me propozimet konkrete të UPZ-së.