Juventusi ëndërron të kryej një transferim “big” në merkaton e verës. Bëhet fjalë për mbrojtësin e Interit, Milan Skriniar, i cili ka shkëlqyer me fanellën e zikaltërve këtë sezon.
Sipas asaj që raporton e përditshmja sportive italiane “TuttoSport”, mbrojtësi sllovak, është një ndër objektivat e mëdha të Juventusit të ri që po rindërtohet për të qenë sërish “padrone” e Italisë.
“Zonja e Vjetër” synon të “blindojë” prapavijën ku kërkon të formojë për të ardhmen një dyshe ëndrrash Skriniar-De Ligt.
Gjithsesi, një operacion i tillë është shumë i vështirë, në mos i pamundur duke qenë se kontrata e 27-vjeçarit skadon në qershorin e vitit 2023, por edhe se drejtuesit zikaltër nuk do ta kishin ndërmend ta shesin sllovakun veçanërisht te një konkurrent direkt si bardhezinjtë nga Torino.
Aktualisht gjatë këtij sezoni me fanellën e Interit në Serinë A, Skriniar është aktivizuar në 31 ndeshje, ku ka shënuar 3 gola dhe nuk ka dhuruar asnjë asist për shokët e skuadrës.
