Kryetari i Nderit i Lidhjes Demokratike të Kosovës (LDK), Fatmir Sejdiu është i gatshëm që të rikthehet si Kryetar përnjëmend në vend të Isa Mustafës në LDK, por partia duket se nuk e dëshiron një gjë të tillë.
“Jo. Nuk jemi të gatshëm ta pranojmë në krye të partisë Fatmri Sejdiun”, ka thënë për Express Haki Rugova, Nënkryetar i LDK’së.
Ai deklaratat e Fatmir Sejdiut, madje i konsideron si metoda puçiste të marrjes së partisë.
“Fatmir Sejdiu po harron që është Kryetar Nderi. Ai këto deklarata dhe qëndrime duhet t’i thotë në forumet e partisë e jo me këto metoda puçiste nga jashtë e përmes medieve”, ka shtuar Rugova.
Nënkryetari i LDK’së thotë se partia në përgjithësi është e kënaqur me punën dhe sukesin e Isa Mustafës dhe se në këtë fazë nuk mund të diskutohet për zgjedhje të parakohshme.
“Isa Mustafa e ka rritur partinë në nivel vendi. Madj LDK-ja nuk ka humbur as në Prishtinë, ani pse nuk u zgjodh Isa Mustafa kryetarë për të tretën herë. LDK’ja në Prishtinë ka mbi 40 % të votave dhe pa diskutim është paria e parë”, thotë Rugova për Express.
Ai ka thënë që janë të vetëdijshëm që Isa Mustafa nuk gëzon 100% të përkrahjes në LDK, por thotë që ekziston disponimi që drejtimi i partisë të mbetet në dorën e tij deri në përfundimin e mandatit në mënyrë të rregullt.
“Fatmir Sejdiu e di si ka ardhur në krye të LDK’së dhe si ka humbur në garë me Isa Mustafën, por prapë se prapë kur të vjen koha e zgjedhjeve të brendshme, secili që i plotëson kushtet është e mundur që të hyjë në garë për të parin e partisë”, thotë Rugova.