“Hallakamë” e madhe te Malisheva. Klubi i Superligës së Kosovës raportohet se ka ndarë rrugët me trajnerin Sami Sërmaxhaj.
Malisheva nisi përgatitjet për stinroin pranveror më 3 janar, por Sërmaxhaj nuk pranoi të udhëtojë me skuadrën në Turqi, raporton FrontOnline.
E gjithë kjo për shkak trajnerit nuk i ishte deponuar kontrata në FFK, dhe për këtë shkak, palët ndanë rrugët.
Megjithatë, Malisheva nuk është ndalur dhe është bërë me trajner të ri.
Bylbyl Sokoli, trajneri i mirënjohur kosovar, do ta marrë drejtimin e Malishevës për stinorin pranveror.
Këtë lajm e ka konfirmuar vet Sokoli për FrontOnline.
“Momentalisht jam në tavolinë me drejtuesit e klubit të Malishevës. Gjithçka do të finalizohet pas pak”, deklaroi të mërkurën Sokoli për portalin.
Ndryshe, Sokoli ka drejtuar shumë skuadra të futbollit të Kosovës.
Prishtina, Flamurtari, Gjilani, Ferizaj, Vllaznia e Pozheranit janë vetëm disa nga klubet që ka drejtuar “Profa”.
Ndryshe, pas 18 javësh në elitën e futbollit kosovar, Malisheva ndodhet në vendin e tetë me 19 pikë të tubuara./FrontOnline/