Kryeministri serb, Ivica Dacic, ka thënë se nuk është i sigurt se negociatat midis Beogradit dhe Prishtinës do të vazhdojnë më 17 janar, për shkak se do të ketë presione shtesë mbi Serbinë përpara konferencës së parë ndërqeveritare për fillimin e negociatave me Bashkimin Evropian, të planifikuara për 21 janar.
“Me Brukselin nuk isha në kontakt që shtatë ditë, për shkak të festave, por javën tjetër do të vazhdojnë takimet e grupeve të punës. Përfaqësuesja e Lartë e BE-së, Catherine Ashton, ka cekur më herët vazhdimin po jo edhe datën”, ka thënë ai.
Ai deklaroi se nuk është pajtuar për 17 janarin si datë për vazhdimin e bisedimeve me Prishtinën, sepse “nuk ishte në disponim që të pranonte këtë datë meqë paraqet presion shtesë mbi Serbinë”.
“Nuk dua të punojmë nën presion, por për të gjetur zgjidhjen më të mirë”, tha Dacic, duke shtuar se patjetër pret presione. “Kriteri kryesor politik për progres të mëtejshëm në negociatat me BE-në do të jetë suksesi dhe vazhdimi i dialogut me Prishtinën”.
Sipas tij, fokusi i dialogut të ardhshëm, nga pavarësia ka kaluar në formimin e Asociacionit të komunave serbe.